شروم بروم عالم نسوان

تنويه ... احترامى الشديد لكل أخت

محترمة فأنا لم أقصد التعميم فى

كلماتى ولكنى أعترض فقط على بعض

المظاهر التى لا تليق فى كثير من النساء .

شروم بروم عالم نسوان

شروم بروم عالم نسوان

شروم بروم أشكال وألوان

شروم بروم جابولنا جنان

وتعالوا نشوف دى واحدة ماشية بتتمختر

كعب عالى وشعر عيرة يا جمال فستانها

تقولش بنت عشرين بتتغندر

اتكعبلت وقع طقم سنانها

اتقلبت فرحتها لأحزان

شروم بروم عالم نسوان

شروم بروم أشكال وألوان

******

ودى بنت جميلة سبحان من صور

شياكة ودلال رقة وجمال

مبهورة بنفسها مغرورة بتتكبر

عينى عليك يا بن الحلال

تعيش حياتك من غير حنان

شروم بروم عالم نسوان

شروم بروم أشكال وألوان

******

ودى واحدة راكبة الأتوبيس فى الزحمة

متعطرة ومتمكيجة ....وعايزة توصل بالسلامة

أل يعنى مش عارفة انه طبيخ وسلطة ولحمة

وناس رخمة وأنفاس وحالة أخر ندامة

والجواب باين من العنوان

شروم بروم عالم نسوان

شروم بروم أشكال وألوان

******

أه م المصايف واللى بيحصل على الشط

اللى هايمه واللى نايمه واللى عايمه

واتفرج يا سلام اشي وز واشي بط

ولا بيعرفوا عيبه ولا يخافوا لايمه

وشباب متحير ومتلخبط

يلطف بينا الرحمن

شروم بروم عالم نسوان

شروم بروم أشكال وألوان

******

والبنت دى وقت الخطوبه

كانت هاديه رقيقه وحبوبه

ولما جات الطوبه فى المعطوبه

بقت زعابير أمشير وبرودة طوبه

وحرب نشبت فى ميدان

شروم بروم عالم نسوان

شروم بروم أشكال وألوان

*****

واه يا ساتر من الست دى

بتطلع أسرار بيتها لدي ودى

وشغالة غيبه ونميمه تاخد وتدي

ولا تسكت يوم ولا تهدي

وجوزها راجل غلبان

شروم بروم عالم نسوان

شروم بروم أشكال والوان

شروم بروم وادى حال النسوان

متى تفيقي يا أمتي ؟

متى تفيقى يا أمتى ؟

وقد دنس أقصانا الكلاب

واستباحوا دماء طفلتى

سلبوا القلب والألباب

وأهانوا عرض أخيتى

وهذا جثمان أخى على التراب

روحه تنادى من يحمل جثتى ؟

يا حسرة القلب على الشباب

افتح يا تاريخ من جديد صفحتى

عنوانها هذا عصر الذئاب

الأقصى يصرخ ألما وا عثرتى

والأمة تقبع جبنا خلف الأبواب

أين أمجادي وقرون وعزتي

أين صلاح الدين وعمر بن الخطاب

أين من رفعوا رأسى وهامتي

تعالوا اضربوا عن وجهى الذباب

يا رب أشكو إليك قلة حيلتى

فأنزل باليهود أشد العقاب

وأيقظ أمتى وقوى ايمانى وهمتى

هيا قومي يا أمتى جاء يوم الحساب

سأريهم وقت النزال قوتى وسطوتى

نصر أو جنة تنادى اشتقت للأحباب

هلموا إليّ يا عمارى وسكنتي

زاد شوقى إليكم وطال الغياب

****************

مدحت الصعيدي (بياع كلام )

حاجة تغيظ و تحرق الدم

السلام عليكم ورحمة الله وبركاته

منورين ودايما سعداء وفى صحة ان شاء الله

فى الأول أحب أعرفكم إنى موظف بسيط فى الأزهر

بنظام التعاقد وبمرتب 249 جنيه ( فى الشهر طبعا مش اليوم )

لا فوقيهم ولا تحتيهم والحمد لله غيرى مش لاقى

( طبعا فيه جنب الوظيفة مصدر تانى ...بالعقل كده )

بس برضه العدل حلو .



_ من كام يوم كنت عند الحلاق مستنى دورى وكان فى التليفزيون

الكاتب محمود سعد فى برنامج البيت بيتك

ولقيته بيتكلم عن حادثة غريبة من نوعها .........

مدير مدرسة كتب مذكرة فى احدى المدرسات

وحولها للشئون القانونية وصعد الموقف جدا

لدرجة انه وصل الأمر للمحافظ

( طبعا أكيد بتقولوا دى عملت جريمة لا أخلاقية عشان توصل

الشكوى للمحافظ ) وكانت الجريمة الرهيبة اللى عملتها .....

انها بتشحن الموبايل من فيشة بالمدرسة

وكده تبقى بتبدد المال العام وتستهلك كهرباء المدرسة

استهلاك شخصى ( .........) تركت بين القوسين

فارغ عشان كل واحد نفسه فى تعليق يقوله يعتبره هو اللى بين القوسين .


- تقابلت مع أحد الموظفين فى شركة مصر للتأمين

وكان واضح على وجهه الاستنفار وعدم الرضا ودخلنا مع بعض

فى حوار وعرفت انه مش متجوز ومش قادر يكون نفسه

عشان مرتبه يدوب أربعة ألاف جنيه فقط غير مكافأة سنوية

حوالى 8 الاف على ما اعتقد وبدافع الفضول سألته ...

انت مش متجوز ازاى 4 ألاف مش مكفيينك ؟

رد والدموع تكاد تخرج من عنيه 4 ألاف ايه

دا أنا بقعد على القهوة شهريا بــ 1200 جنيه

( طبعا كتمت غيظى فى نفسى وقلت أكمل الكلام معاه )

فقلتله امال اللى مرتبه 250 جنيه ( خليها علينا بزايد ) يعمل ايه .......

رد وقالى ده مش عايش أصلا ومرتبه بشترى بيه جرايد

( قلت فى نفسى وقتها سبحانك يا رب ... بتقسم الارزاق بين

الناس بحكمة

كل واحد حسب عيشته وصدق المثل اللى عندنا بيقول ....

( ربك رب العطا بيدى الحاف على قد الغطا ) .

واستطرد فى كلامه وقال ان المدير بتاعهم بكى بالدموع

عشان المكافأة السنوية بتاعته اتخفضت من 18 ألف جنيه فى السنة

إلى 12 ألف جنيه بس ( حقه يبكى دول 6 ألاف نقص )

طبعا استأذنت وأخدت بعضى وروحت بيتنا أحسن ما أسمع أكتر من كده .


- ولما روحت وأنا بفكر فى كلامه تذكرت رئيس تحرير الأهرام الأسبق

إبراهيم نافع لما تمت إقالته وابتدوا ينقبوا ويفتشوا وراه

قريت فى الجرايد وقتها ان مرتبه شهريا كان 3 مليون جنيه

وبيطلع ليه نسبة من توزيع الجريدة ونسبة من الاعلانات اللى فى

الجريدة تقدر بــ 3 مليون جنيه وان السكرتيرة بتاعته مرتبها 11 ألف جنيه

( ده يا جماعة رئيس واحد لجريدة واحدة وطنية فى

وزارة واحدة وفكروا فى الباقى وحدكم ) .

- أول امبارح ظهر شيخ الازهر زعلان على احدى الفضائيات

وقال لازم أجتمع باللجنة ويصدر قرار...........

بمنع أى بنت ترتدى النقاب فى فصل كله بنات والمدرسة بتاعتهم بنت

( يا سلام على الذكاء ...من غير قرار )

وكمان قال انه شخط فى بنت فى ابتدائى لما لقاها لابسه حجاب

وقالها انتى لسه صغيرة ( ده من باب انها تستمتع بحياة الطفولة )

كفاية كده على البوست

وكفاية كمان حرقة دم

ليه يا حبيبى تجرحنى

ليه يا حبيبى تجرحنى

كنت تقولى وتنصحنى

كنت ارحمنى وصارحنى

ولا تزعل من بجد

هو عشان حبيتك

وبلهفة قلبى ناديتك

وبروحى اتمنيتك

وانت ليا تصد

دا أنا حبيتك بجنون

وكنت حياتى وكل الكون

من غير ما اعرف مين تكون

أو حتى يجينى الرد

كنتى الحلم اللى اتمنى

كنتى الفرحة اللى استنى

كنتى النار وكنتى الجنة

وكنتى الحب وكنتى الود

عشت معاكى أحلى ايامى

وف ضل هواكى لقيت احلامى

وصدقت معاكى ف كل كلامى

ومشيت على شوك الورد

ليه بدلتى الضحكة بدمعه

ليه طفيتى من عنيه اللمعه

ليه حرقتى أخر شمعة

واللى بنيته معاكى اتهد

هبعد بعيد وانساكى

وانسى احزانى معاكى

وادور تانى على ملاكى

اللى يوفى معايا الوعد

مدحت الصعيدى

زمان يا حب

إننا فى عصر السرعة فى كل شىء حتى سنوات العمر تنقضى سريعا دون أن نشعر

وأصبح الحب أيضا متماشيا مع العصر يأتى سريعا وينتهى سريعا وأصبحت

الحياة مليئة بأنين المحبين وألام العاشقين فما أكثر جراح القلوب فى عصر الحب

عبر شبكات الانترنت وأجهزة المحمول وغيرها .

حضرتنى هذه الكلمات فدونتها حتى لا ترحل بلا عودة ........

أصبحت كلمة الحب

فى عصرنا هذا

كالأوراق المالية

سهلة التداول...

سريعة الصرف.....

كثيرة التعامل.......

وربما بعضها زائفة أو بالية

وأصبحت القلوب حائرة

والعواطف كلمة عابرة

والعقول منها ساخرة

وأصبح الحب

ضربا من الجنون

فهل ألقى بقلبى

فى درب الجنون

أم أتركه كما اعتاد

فى هذا السكون .

انا فكرت كتير فى صورة البوست واللى عجبتنى دى معرفش ان كانت مناسبة للكلمات

ولا نغيرها يا ريت أعرف رأيكم .

إلى مجهولة

غريبة أنت ...و مبهمة أنت

حائرة أنت ...أم مغرمة أنت

تائهة ...ضائعة....عاشقة لنحرى

حبيبة ...قريبة ....ساكنة فى قلبى

من أنت...ماذا تريدى....لست أدرى

قرأت ألاف الكتب والمجلدات ...

بحثت فى معاجم كل اللغات ......

سألت العلماء.....

جلست إلى الحكماء ......

استمعت الى الشعراء.........

بحثت فى أقوال النقاد والأدباء .......

لعلى أفهم حقيقتك .......

لعلى أجد تفسيرا لك .....

لم أعرف إلا بعض الأشياء عنك ....

فقد حار الجميع فيك ....

وفى فهم معانيك .........

إنى أناديك .....

.فأجيبينى ....

خبرينى عنك ......

أم أنك صماء ........

لا تسمعينى .

****

بياع كلام

مشى حالك ....حالك يمشى

مشى حالك ......حالك يمشى

جملة بنسمعها كتير وبنقولها كتير لأنها بصراحة بتسهل أمور كتير

الجملة دى هى المصطلح البديل والقناع لكلمة رشوة واحنا طبعا لبسناها

القناع ده علشان نرضى انفسنا لأن كلمة رشوة فيها مساوىء كتير منها ...

- انها حرام والنبى عليه الصلاة والسلام بيقول (( لعن الله الراشى والمرتشى))

- بتنقص من قدر صاحبها واللى بيتعامل بيها ( طبعا صعبة فلان راشى أو مرتشى )

دى تسجنه انما فلان بيمشى حاله ..عادى ممكن تعدى .

- كلمة رشوة تقيلة على النفس والقلب (لما تيجى ترشى واحد معقول حتقوله خد رشوة)

مشى حالك بقت حجتنا فى كل حاجة وكل مصلحة عايزينها تتقضى ودى حقيقة يا جماعة

رغم اننا عارفين الصح ورغم اننا مش راضيين عنها انما مجبرين علشان مش عايزين

نمشى فى السكة الصح لأنها بتاخد وقت كبير ولففينى ودورينى يا دنيا واحنا لا عندنا وقت

ولا عندنا صبر ولا عندنا حيل ولا قوة علشان نلف مش كفاية الأسعار اللى دوختنا وخلتنا

نلف حوالين نفسنا ....نرجع لمشى حالك ... حالك يمشى وطبعا بيختلف مقدار تمشية الحال

حسب الحاجة وحسب الشخص وحسب فراغة العين ( طبعا لأن الفراش مش زى المدير ولا

اللى عايز يسلك حتة أرض زى اللى عايز يسلك قميص من الجمارك مثلا يعنى ) .

حقولكم كام مثال لـ..مشى حالك ...حالك يمشى

- عايز تتطلع رخصة قيادة لسيارة ومش بتعرف تسوق أو بتسوق طشاش .....ممكن

بس....مشى حالك ....حالك يمشى ( وده بيفسر لكم الحواديث الكتييييير بالفاضى والمليان ).

- ماشى بعربيتك مخالف أو عندك حمولة زيادة أو ..أو ....قرب لعسكرى المرور بالعربية

ومن الشباك ....مشى حالك ....حالك يمشى ( وبرضه ممكن يطلع مفتح ويديك المخالفة ) .

- حاسس بشوية تعب ورايح للدكتور تكشف لقيت العيادة زحمة خالص ولسه حتستنى دورك

....مشى حالك ...حالك يمشى ( بيسموه كشف مستعجل انما من وجهة نظرى انه رشوة ومن

أصعب الرشاوى لأنه على حساب صحة ومرض ناس تانيين إلا إذا كان المستعجل ده بسبب مرض

بجد ومش قادر يستحمل الانتظار ) .

- ربنا رزقك بمولود جديد وعايز تسجلة بسهولة وسرعة ومن غير تعقيد ...مشى حالك ....حالك يمشى

( شفتوا حياة أولادنا بتبدأ ازاى ) .

أنا ذكرت الحاجات البسيطة اللى على قد حالاتى لأنى مش بتعامل مع الحاجات التقيلة التانية زى

الأراضى والأثار وغيرها وربنا يسترها معانا ومعاكم وهكتفى لحد هنا .

مع تحياتى....بياع كلام

احبك

باعترفلك يا منايا انى بحبك

وانك انتى فرحة عنيا وحياتى



وبقولك وصدقينى لما اقولك



انك فى بالى وخيالى يوماتى



وقلبى فرحته وهو جنبك



بانسى معاكى احزانى واهاتى



باشتقلك فى بعدك وف قربك



خليكى معايا ف كل اوقاتى



وخلينى أعيش فى حضن قلبك



واكتب أول فرحة فى ذكرياتى



اسقينى الهوى من رحيق شهدك



واسقينى واملى واسقينى تانى



حفضل على عهد الحب وعهدك



باقى مهما تعبنى معاه زمانى



وحفضل اقول بحبك بحبك بحبك

القدر ...والصوت الشجى

براءة .....
نعم اسم سورة من سور القرأن الكريم والوحيدة التى لم تبدأ بالبسملة
براءة التى أقصدها هنا ليست السورة الكريمة وانما براءة أخرى ..
طفلة يتيمة فقدت والديها وأصابها مرض خبيث وهى الأن فى فترة
العلاج بالخارج فادعوا الله معى جميعا أن يشفيها ويعافيها ويحفظها
من كل سوء .
وإليكم صوت هذه الطفلة الساحر وهى تقرأ القرأن والتى تحفظه كاملا

http://www.youtube.com/watch?v=NnNS9ID9Ecw

http://www.youtube.com/watch?v=gkIO02s6Ywg

وهذا هو صوتها الشجى وأنشودة يا دمعتى اليتيمة

http://www.youtube.com/watch?v=6dY99FilXJM

وأنا بدور على موضوع أضيفة لمدونتى فاستوقفتنى براءة بصوتها وقصتها
فقلت لازم أكتب عنها وأسمعكم صوتها وأكيد فيه اللى يعرف بالقصة دى
وسمع صوت براءة وفيه اللى أول مرة يعرف أو يسمع زى حالاتى كده
وأنا بحثت عن صورة على النت لبراءة فوجدت الصورة المرفقة أعلى
أتمنى الموضوع ينال اعجابكم .

من أجمل ما قرأت

إلــــــهي ،،،كــفــاني فـخـــراً أن تـكـــون لي ربــــــــاً

علي بن ابي طالب كرم الله وجهه

كـل شيء يـبـدأ صـغـيراً ثـم يكـبر إلا المصيـبة
فـإنـها تـبـدأ كــبـيرة ثـم تـصـغــر

نصــر بن يســار رحمه الله

عـجـبـتُ مـمـن يـشـتـري المـمـالـيـك بـمـالـه
كــيـف لا يـشـــتـري الأحــــــرار بـمـعــروفــه
ابـن الـسـمّـاك رحمه الله

حـمـل الصـدق كـحـمـل الجـبـال الـرواسي
لا يـطـيـقـه إلا أصـحــاب الـعـزائـــما

بن قـيّـم الجـوزيـه رحمه الله

لـئـن أطـلـب الـدنـيـا بـمـزمــار
أحـب إلي مــن أن أطـلـبـهـــا بـالـديـــن
بـشــر الـحــافي رحمه الله

خِـــف الله عـلى قـــدر قــدرتـــه عـليــك
واسـتـحي مـنـه عـلى قـدر قــربـه مـنـك

وهب بن الورد رحمه الله

لا دار للمـرء بعد الموت يسكنها
إلا التي كان قبل الموت يـبنيها

فإن بناها بخيرٍ طاب مسكنها

وإن بناها بـشـرٍ خاب بانيها
علي بن أبي طالب رضي الله عنه

إن اسـتـطعـت أن لا يـسـبـقـك إلى ألله أحــد فـافـعـل
عبدالله بن عباس رضي الله عنه

إتــّقِ الله أن يكون الله أهون النـاظريـن إليـك
وهب بن الورد رحمه الله

إذا بـلغـك عن أخـيـك شـيـئـاً تـكـرهه فـالتـمس لـه العـذر
فإن لم تجد له عذراً فقل في نفسك لعلّ لأخي عذراً لا أعلمه
عبدالله بن زيد رضي الله عنه

لـئـن يعضّ أحـدكـم على جمـرةٍ حتى تطفأ
خيرٌ له من أن يقول لأمــرٍ قضــاه اللهليـت هــذا لـم يـكــن
عبدالله بن مسعود رضي الله عنه

الغضـب مثـل السـبـع
إذا أفـلتـه صاحـبه بـدأ بـأكـلـها

بـن قـيّـم الجـوزيــه رحمه الله

من رضي بقضاء الله جرى عليه وكان له أجـر
ومن لم يـرضَ جـرى عـلـيـه وحـبـــط عـمـلــه

ابـن قـيّـم الجـوزيــه رحمه الله .

مما أعجبنى

مقبرة العاشقين

مقبرة العاشقين

ما زلت أبحث عن دليل

يعيد لى قلبى العليل

فقد أبحرت فى عنيك يوما

ومضى على زمان طويل

جرفتنى أمواجها إلى العميق

وليس لشطئانها من سبيل

أسبح فيها بلا خل أو صديق

فلا أجد الحب ولا الرفيق

ويضيع من قلبى الطريق

وتشدنى موجة إلى العميق

فإذا بقلوب ليست بقليل

ماذا قتلكم فى بحرها

نحن قتلى فى حب مستحيل

من غدر ومن خيانة

ومن كبر كلنا فى جنون

يا إلهى كيف غرقت ببحرها

وأنا الذى تعلمت لغة العيون

أين الدليل لشطئانها

كيف الشفاء من سحرها

إنى أغرق ببحرها

أين البحارة والملاحين

أين الكتب التى خبرتنى عنها

أين روايات العاشقين

أين ترانيم العشق الزائفة

أين طهارة الحب يا قديسين

أين قصص الإخلاص التى

حفظناها على مر السنين

أين أنا .... خبرونى فى

بحر العشق أم فى .....

مقبرة العاشقين